Kaiola ertzetik begiratzen dut

Gustoko nuen bizi hura, gustoko nuen benetan aire garbian bidaiatzen genueneko garai haiek, gogoko nituen benetan kezkarik gabeko une haiek eta biziki gogoko nituen bai, aske eta libre nintzeneko momentu zoragarri zein liluragarri haiek.

Ni beti izan naiz izaera lasai eta trankilekoa, orain berriz egunak joan egunak etorri, nire lasaitasun haren tokia etorri berri den urduritasunezko sentimendu batek bereganatu du; lehoiak, bere presa, bere atzamar handi eta indartsuen bitartez harrapatzen duen moduan. Horrela jokatu du demoniozko urduritasun honek ere; gupidarik gabe alegia. Baina bisita egitera etorri zitzaidan etsai bakarra ez da urduritasun desatsegin hau izan, ez jauna! Urduritasuna etorri eta hurrengo egunean, tristura etorri zen bihotz joka. Bisitari honek ezustean harrapatu ninduen eta arrapaladan sartu zen barrura, prisa izango balu bezala. Joateko aldiz, ez zuen inolako prisarik izango, alderantziz baizik; gustura sentitzen zela eta nirekin geldituko zen luzaroan, betirako ez esateagatik. Baina, ez da hau guztia, beste hainbat bisitari ere izan bainituen, denak nirekin gelditzeko nolabaiteko esperantza zutelarik: atsekabea, estresa, goibeltasuna, mina, depresioa, ahuldura eta azkenik heriotza.

Azken bisitari hau, ezberdina zen gainontzekoengandik. Besteak baino ilunagoa eta kaltegarriagoa iruditu zitzaidan hasieran, baina ondoren jabetu nintzen agian berak izango zuela nire mina sendatzeko balioko zuen botika bakarra.

Gau batean, bisitari misteriotsu honek nire gelako atea jo zuen. Ni hasieran izuturik agertu nintzen, bere itxura desatseginaz ikaratuta. Ondoren… ez!! Egia esan behar badut ez naiz ondo oroitzen gero gertatutakoaz beraz ez naiz gauza gertatu zena zehatz-mehatz kontatzeko. Dakidan gauza bakarra zera da, bisitari guztiak berehala desagertu egin zirela, beno… azkeneko hura noizean behin ikusten dut baina ez diot garrantzia handirik ematen. Dakidan gauza bakarra zera da orain, beste bisitari malapartatu haien ordez beste hobeago batzuk etortzen zaizkidala bisita egitera; beraien besoetan opari ederrak dakartzatela: alaitasuna, edertasuna, lasaitasuna, indarra, energia, animoak eta guztietan gogokoena, ASKATASUNA!